tuwapos

Uhaw sa yutan-ong panalangin
Ang simboryong gitupsan sa hangin.

-- VICENTE VIVENCIO BANDILLO

Koror, Palau

pagkatawo sa usa ka bag-ong adlaw

ang mga kuyamoy sa kahayag
mihapuhap sa mga dahon nga nangahulog sa yuta

ang kamot sa mainiton nga kabuntagon
midap-ig sa nawong sa kaanyag sa akong adlaw

ang panahon nahimong habol ug alugnan
nga gidulgan sa katam-is ug kaaslom

ang kahinam sa kahaponon dili kamaong
motagad sa pag-abot sa kahumot sa kagabhion

gigakos niini ang kalami sa kangitngit
nadungog ang agulo sa kalipay

nagawsan ang mga bituon
dungan sa kinatibuk-an nga bulan

nahilom ang yuta nga nahupong sa duga sa mga yamog
nawala ang mga hugyaw sa mga gangis nga tampalasan

ug natagbaw ang mga kwaknit sa ilang pagkiniat
hangtod sa pagtugdong sa mga pako sa kaadlawon

diha sa mga kahoy nga mautganon
miawit ang nagun-ob nga lapyahan

ug natawo ang usa ka bag-ong adlaw sa amihanan

-- RIC S. BASTASA

Katipunan, Zamboanga del Norte, Philippines

ang taytayan sa kahilom

Ang kahilom usa ka taytayan
Nga mahimo baya
Nga imo ug ako’ng labngon.
Apan ang mga pulong
Bug-at nga mga tiil
Nga way pulos sa pagtabok.
Lakaw sama sa kahuyo
Sa pinitik sa kasingkasing,
Sama sa kagaan sa mga panganod,
Sama sa kasihag sa huyuhoy--
Ug ikaw ug ako nga nia
Sa masigkapikas nga tumoy,
Dunay lanot sa paglaom
Nga mabitad
Aron kita magkadinul-anay.

-- URIAS A. ALMAGRO
New Berlin, Wisconsin, USA

duha ka dagway ni maria clara

Matahom ka
Kay nagluyloy ang imong mga mata
Ug sangko sa yuta ang imong saya
Ang imong baba morag rosa
Bisag dili pa uso ang lipstick sa una

Ngil-ad ka
Kay lumoy ang imong dughan
Nga sa abaniko imong gitabonan
Ang imong ilong liwat sa imong Mama
Dili taliwtiw sama sa korona

Matahom ka
Kay dili ka mosupak
Sa huyop sa hangin sulod sa simbahan
Bisag wala ka buligi sa mga balaan
Ug santos nga misang imong dangpananan

Ngil-ad ka
Kay modawat ka sa tanan
Nga mga pangos ning kalibotan
Ang imong ulo nagpadayon pagduko
Atubangan sa buhawing nagpanuko

Matahom ka
Kay natagamtam nimo ang gugma
Sa sulod sa bilanggoan
Nga imong nahimutangan
Diin nasaag ang usa ka alibangbang

Ngil-ad ka
Samtang naa'y daghan
Sa mga kababayen-an
Gaduko uyon sa imong alimpatakan
Taas og buhok kutob sa baul nga bulawan

Matahum ka

Ngil-ad ka
Buhi pa
Patay na.


-- MARIA VICTORIA BELTRAN
Cebu City, Philippines

dalikyat panghagdaw sa great wall of china uban ni confucius (pebrero 4, 2009)

Napanimahoan ko ang mga gerilyang tunob ni Mao Tse-Tung sa mga batosemento
sa nanghuyatid nagdupang parilbungbong Iyang mga balak mga pikot bulak
nanglusot namuswak sa mga gingi ilawom sa usyosong mga mata sa nanagdali
naghangos nga mga sapatos Nangligdas ang santilmong anino sa mga bukog
ni Genghis Khan nga misulong gikan sa habagatang Mongolia Nasiplatan
sa mapaniirong handurawan ang mga nadugtang bayhon sa nangahulog nga mga
pandaytrabahador pipila ka siglo kaniadto Nagsuroysuroy nagpasopaso kanhi
dinhi ang mga emperador sa nalumpag nga mga pakhang dinastiya

Ang kableng misapwang kanako human sa makutas sakakanaog mihunghong og
mawilihon nagkayuring inensek panamilit: Zai Jian Bai Bai

-- MELQUIADITO M. ALLEGO
Palm Harbor, Florida, USA

bakho sa hinigugma ni salayaw

i. kansiyon sa tawong lasangnon
Paminaw kamo, kamong mga labang* nga nagtago
Sa binag-ong pangaw*
Kamong nagpakaaron-ingnong pula ang mga ngabil
Kamong tigbagting sa lingganay
Kamong nagtabisay ang laway sa pasunding sa mga inosente
Ang akong dasang* mamahimong bakho karong gabii
Pakuratan ko ang kable sa inyong mga kuryente
Mokayaw sa nagtuliyok, nagsigyab ninyong mga kalye
Ako si Animay, ako ang maalamong babaye
Nagpakabatid lamang sa pakigsuod sa lasang
Mokulo ang itlog sa inyong mga puthawng sakyanan
Mahun-ag ang habog ninyong mga katedral
Kataw-an ko lang ang basahonan sa inyong alamag
Ay, kamong mga tampalasan!
Kamong mga hininginlan ni Makaako*
Unsay mahimo sa giwara-wara ninyong santilmong kahayag?
Diin papason lamang kana sa nagbaga kong luha
Pangandam kamo, kay inighagtok sa tungang gabii
Sabyagan ko sa makapasong tilad
Ang kagamhanan sa inyong mga kilay
Ug imakuli ko kaninyo
Ang yutang pagatugsaran sa inyong mga tiil
Mobakho sab kamo, sama kanako:
Inda kang dasang sa makaginhawa*
Ay, kamong mga berdugo sa kangitngit
Pasagdi ninyong mangluno og
Mga tanghagang yamog
Ang kinumo sa Bulalacao, Pokanin ug Pangalkagan*
Ay, mga diwatang manluluwas sa among kaliwatan
Pasagdi ninyong mangalibwag ang tulisok
Sa liboan ka mga lagong
Sa gabii sa kasuko sa akong dasang
Nasayod na ang mahamis nga mga bato sa pangpang
Ang kabalaan sa among mga panumpa
Diin ba nagagikan ang bakakon ninyong sigyab?
Nahisama kamo sa mangingilad nga manalagna
Kun susama sa talawang mesiyas
Gipasibantog ninyo ang buhilamang mahayag
Ay, matunaw lamang kana sa akong pagsulirab
Di ba hinambog lang ang pagpangandoy sa udtong tutok
Paminaw, O malinglahong Batik
Paminaw kamo, kamong talawang mga manggugubat
Kamong mga hangol ang kalag
Ako ang tingog sa gugma…

ii. gininhawa, inalisngaw, ug bahakhak sa lapok
Nahigmata ako usa ka buntag
Nga walay kapuslanan ang hinugangkol sa
Lantoy, kudlung, pituh ug buray-dipay*
Mibiya ka, akong Salayaw
Nahanaw kang gitangag sa buhawi
Dili na ko mokiay pa sa basal sa gangsah*
Sukad karon, pangitaon ko ang anino mo sa alang*
Di ba sa bukton mo, ako ang tigpana nga baganining?*
Ikaw ang kalibotan kong kalab-oton
Ang pagkawala mo, ikamatay ko
Ug sa mga daklit nga kuliton ko na usab
Sa buko sa kawayan, ang mga berso sa akong kahinug-o
Inanay kang molutaw sa prismo sa akong luha
Ug sab-ongan mo na usab ako og saag nga mga bulak
Ay, sa hapyod sa imong halok ug gakos
Dili na ako mobakho
Ako ang balaang rayna sa sa imong kagamhanan
Mabati ko ang hagawhaw sa langob ni Mulat
Tungod kay kagahapon, siya ang espiritung nagpasundayag
Naka-igya sa kanmi balay
Mopahulay ka sa akong tagoangkan, o akong minahal—
Ako ang sapa-sapa nga tinubdan sa mga tawong maisog
Kon nadungog mo lang unta ang akong pangilaba
Sa sawumsom, paaboton ko ang imong pagpauli
Ug subli tang saulogon ang atong panagdulog
Gabii na, Salayaw… gabii na akong minahal…

iii. kon unsaon pagtutok sa luspad nga kahayag sa Buwan
Alingisig na ang rap sa bidyoke
Giyarok na nila ang akong kahiubos
Ug nanagsayaw sila sa lingagngagan sa gabii
Ang kiat nga mga mata sa mga ngiwngiw
Ania na sila, ania na ang huwabong mga magbabalak
Kay wa gani sila makahubad sa sinultihan sa mga bituon
Tuhirig ang ilang mga lakang, lakang, lakang—
Sila ang mga palahubog nga nagbandilyo og makahilong kulihad
Ang kagabhion nga giharanaan lamang kaniadto
Sa mga tuko ug kuwaknit
Wala na, naabo na sa kasaysayang
Gipahiluna sa mga estante sa giagup-opan nilang mga museyo
Nakabiya na ang saag nga gangis
Kay giluod sa gininhawa sa panghugasan
Ang panagdumog sa kaigat ug kabiga gidala-dala
Sa alimpulos sa tigi sa kinagayay sa
Hambogerong dolyar ug pesong makililimos
Salayaw, ikaw na lang ang nahibiling balaan
Sa buhilaman sa mga hungog
Ayaw pagkuray sa panghadlok
Naglibog ka? Magpaanod ka ba sa sulog?
Inudnod ka nila sa lapok
Tanang adunay kinabuhi, mangadunot
Walay makalugnot
Ug kinsa ang pagadihogan nga bag-ong
Tiglitok sa buluhaton ni Ginaw Bilog*?
Gisukod na sa balaang panudlakan ang agumon*
Luwasa ang kaliwatan batok sa mga damuong*
Balik, Salayaw, balik sa atong guraan*!
Ayawg kasulaw sa makalibat nga kahayag
Pasagdan mo bang ang giampingang
Budaya* ilogon ug himoong butang sa panamastamas?
Magpadala ka ba sa ilang bahakhak?
Di ba nga karudwa* man kana sa kamatayon?
Salayaw, balik ug lukata ang atong mga saad
Paaboton ka sa amihan ug biyuos sa orkidyas
Ug dungan natong tubagon ang tigmo sa
Mga bituon, dungan kitang mangindahay sa kawalaan
Sa gingharian sa atong gugma. Giampingan ko
Hangtod karon ang panulundong tumon*
Tungod kay nasayod ko, kini ang ikalipay mo
Ako si Animay, ang imong sinaaran
Balik na ug lab-ason ta ang
Sabakan sa atong gugma
Ug sa tanang pulang bulak
Malantaw nila ang kabalaan
Sa hiniusang katahoman sa atong mga gakos
Ug ang mga anak ta mamahimong alibangbang
Kita ang maisog nga mga ulipon sa saad nga gibug-os
Ug dungan nga maalim ang atong mga samad ug pangos…

_____________________________________________
* Salayaw: Usa sa upat ka Mangyan nga gipadala niadtong 1904 sa mga Amerikano sa gipahigayon nga St. Louis Exposition sa St. Louis, Missouri, U.S.A kauban ang uban pang mga lumad sa Pilipinas. Ang uban pang kauban ni Salayaw mao sila si Kabesa Sabong nga maoy pangulo, Sinhigan, Daliwnan, ug Karyo. Wala hisayri sa ilang banay kon nganong sila ‘gidagit’ sa mga Amerikano. Tungod sa naghingaping kamingaw, nagmugna silag sulat pinaagi sa buko sa kawayan ug gipadala kini sa ilang mga pamilya pinaagi sa mga Amerikano nga nagdumala kanila. Apan wa kini mahiabot sa mga hingtungdan sa wa hisayring hinungdan. Ang ‘ambahan’ mao ang lumadnong matang sa pamalak nga Mangyan.
* labang: Daotang espiritu
* pangaw: Pagsilot pinaagi sa pagpiit sa tiil sa sad-an ginamit ang duha ka kahoy.
* dasang: Pamalak nga kaamgid sa elehiya sa Iningles
* Makaako: Labawng Diyos sa tribung Hanunoo Mangyan
* Inda kang dasang sa makaginhawa: Maoy tuyo sa balak ko nga magpahayag. (pinulongang Mangyan)
* Bulalacao, Pokanin ug Pangalkagan: Mga dapit sa Mindoro nga dunay konsentrasyon sa mga Mangyan.
* batik: Ngalan sa usa ka hugpong sa mga bituon
* buray-dipay: Mga instrumentong pangmusika sa mga Mangyan
* gangsah: Lumadnong tambol nga gama sa bronse
* alang: Payag nga giingong pinuy-anan sa mga Diyos
* baganining: Babayeng manggugubat
* Naka-igya sa kanmi balay: Natulog siya sa atong panimalay (pinulongang Mangyan)

* Ginaw Bilog: Kontemporaryong magbabalak Mangyan nga batid sa ambahan
* panudlakan: Pangulo sa Hanunoo Mangyan nga may gibatonang gahom
* agumon: Sa kulturang Mangyan, paghatag og serbisyo sa kaslonon nga ulitawo ngadto sa iyang mga uganganon
* damuong: Langyaw
* guraan: Komunidad sa mga Iraya Mangyan, sagad grupo sa tagnapulo ka balay kun sinarekked.
* Budaya: Kultura

* karudwa: Espiritu sa namatay

* panulundong tumon: Puting tela, sa kulturang Mangyan simbolo sa pagkabirhen sa babaye
_______________________________________________

-- OMAR KHALID
Medellin, Cebu, Philippines

pasidaan

sa ubos sa walang bahin sa lawanit
nga pultahan sa gusbat ug abogon
nga payag sa utlanan sa lungsod
kinawatkawat nga gidrowing sa bata
ang iyang nawong inigkahamtong niya
sama nga wa siyay laing gipangandoy
wa lang siya masayod nga sayon ra
unta kaayong maangkon ang pagtugot
sa tagbalay tungod kay ampay niya
ang kahumot sa tisas ug usab dili siya
ihalas sa mga sudlanan ug gawsanan
ug sa timaan sa handurawng tinagidyot
nga gipang-apod-apod alang sa dili-
kabayrang kahimuot ni Kamatayon

-- VICENTE VIVENCIO BANDILLO

Koror, Palau

text sa managtiayon

Hapon na.
Nag-text ang akong bana.

"Day, ari na, kay wa na koy
Ikapalit og donut."

Akong gibawsan:
"Panaghoy na lang diha,
Kay hapit na ko moanha."

Soooo. Soooo. Soooo.
"Nindot ba ang akong taghoy?"

"Maayo sab.
Morag hungaw lang."

Tubag niya: "morag bitin
Nga nangitlog no?" Soooo.

(Akong hunahuna:
morag di na ni matapos da.)

Text kog balik:
"Morag nangutot, ang imong taghoy,
Og ligngin..."

(Wa na ko tubaga.
Da, hunong lagi.)

Beep. Beep.

"Dali na ngari, Day.
Nag-uwan na."

-- MILAGROS T. DUMDUM

Talisay City, Cebu, Philippines

paghikita niadtong giuban nga tigulang nga lalaki nga ang kasugiran mihulad sa banikanhong mga balili

(hubad sa balak ni Li Po)

Human sa bino, migawas ako ngadto sa mga basakan,
nagsuroysuroy sa hawan nga banika-– nagkanta,

nangutana sa akong kaugalingon giunsa nga ang berde’ng mga balili
nahimo’ng usa ka giuban nga tigulang nga lalaki.

Apan dihang nagtan-aw ako ngadto sa usa ka masin-ag nga salamin,
Ako siya’ng nakit-an usab sa napalya kong mga buhok.

Ang kahumot sa bulak daw mibadlong kanako.
Gipasagdan kong ang kagul-anan mibiya, ug miatubang sa mga hangin sa silangan.

Gihubad ni:
-- URIAS A. ALMAGRO
New Berlin, Wisconsin, USA

kahilom

tigumon nako ang kahilom
sa akong lawak, unya akong tipigan

sa akong alimpatakan ug sa mga adlaw

nga igo ra intaw’ng molabay,

magkaanam kini'g kadaghan
hangtod nga moawas, mangita'g

kagawsan, ug manglusot kini

sa akong mata, sa akong ilong, sa akong baba,

sa akong mga tudlo, sa papel hangtod

manggamot, manalingsing kini'g

laing kahilom diha sa imong gibasa

-- JONA B. BERING
Tuburan, Cebu, Philippines

bahandi sa mananggiti

Dili baya talagsaon ang iyang pagtempla sa tungog
Bisan hangtod karon gisigehan pag lalis sa mga palahubog.
Tanang salamangkero parehas nga may pangamot
Lihirong manghinol sa salampati sa sibot.
Dili sab talagsaon ang iyang kabatid pagtikang sa hakhak
Duha ka dekada na niyang gibantok sa pagsaka-kanaog.
Tanang eskrimador parehas rang may lapalapang di mokurog
Estokadang de numero makalibat makabulhog
Yano lang sab ang kaigmat sa iyang kasikas matag buntag-hapon
Sa kakukig kapiskay, way kusmod, way pangluod
Tanang iring banbanon magpasiplat sa inun-onang libod
Sa kakigmat, di mamatikdan ang inampingang mga lihok

Sila maayong pagkalibog sa tigmo sa suwab sa iyang sanggot
Apan ang tinagoan masayran kon matugkad mo na ang gilay-on
Taliwa sa perkusyong sonata sa pitlagong ug sa purol nga buslot.

-- OMAR KHALID
Medellin, Cebu, Philippines

bagyo

Sa akong kauhaw
Gisuyop nako ang hangin
Apan kini nahimong baha
Nga mibuswak
Sa akong mga mata.

-- MILAGROS T. DUMDUM

Talisay City, Cebu, Philippines

ang gisaligan nga kasingkasing

ang iyang timon
nabali

ang iyang sakayan
nasalaag

wala siya'y gibuhat
sa dihang

miabre ang dakong
baba sa balod

walay gibasol
ang tumang kahilom

gihatag lang niya
ang alang sa kasubo

-- RIC S. BASTASA

Katipunan, Zamboanga del Norte, Philippines

isla sa bantayan

puti perlas ang mga balas
gigkanon mahagwaon ang mga balod
samtang gisabak kong lumad maanyag
sirena/kapikas diwanag

-- MELQUIADITO M. ALLEGO
Palm Harbor, Florida, USA

namulong ang katulogon

kamatayon aduna ka bay amahan
nga maisip mong imoha ra kay
ako wa gani wa koy panumdoman
kabahin sa pagkahimugso o sa
pagkabata o sa kabatan-on bisan
tuod matag karon ug unya tingali
maabtan mo ako sa bisan asang
dapit ingon nga kini idulot usab
kanimo sa kataposang adlaw sa
umaabot apan dugay na intawon
kaayo nga nahitabo ni gani ikaw
mismo wa ra kaalinggat nga ang
kahadlok ko kanimo hagbay rang
napapas sa akong panumdoman

-- VICENTE VIVENCIO BANDILLO

Koror, Palau

mga butang

(hubad sa balak ni Jorge Luis Borges)

Ang akong sungkod, ang sensiyo sa akong bulsa, ang hugpong sa mga yawi,
Ang matinahurong kandado, ang nalangang mga nota
Nga ang pipila ka adlaw nga nahibilin kanako wa nay hipalgang panahon
Pagbasa, ang mga baraha, ang ibabaw sa lamisa,
Usa ka libro, nga piit nga gilunip sa iyang mga panid ang nalawos
Nga violeta, usa ka bantayog alang sa kahaponon
Nga sa way pagduda dili mahimong hikalimtan, apan karon ningkalimtan,
Ang salamin didto sa kasadpan diin ang usa ka pula’ng pagsilang sa adlaw
Nagdilaab sa iyang ilusyon. Pipila man ka mga butang,
Mga files, mga bakanan, mga mapa, mga baso sa bino, mga lansang,
Nga nag-alagad kanato sama sa mga ulipon nga way pagtingog bisa’g usa ka pulong,
Mga buta ug maong kahibulongan sa pagkamanggiulawon.
Magpadayon sila’ng mabuhi bisan human sa atong pagkahanaw;
Ug sila wa gyu’y kasayoran nga kita mibiya na.

Gihubad ni:
-- URIAS A. ALMAGRO

New Berlin, Wisconsin, USA

kamras nga laylay sa kalaay

Tingkatulog na. Ikaw, balak nga budlat

gabuy-od sa hawla sa akong paghinuwat,

kanus-a mo ako dagiton aron kita dungan

pagbatog diha sa mga pilok sa sidlakan?

-- MICHAEL U. OBENIETA

Topeka, Kansas, USA

hamubong kalipay

daklit nga hulagway
sa duha ka anino diha sa sakayan
nga ilang gidungan pagbugsay
wala damha ang lilo gikan
sa tunga sa lawod diin sila nalunod
ug unya nabanlas sa hunasan sa kalimot
diin ang inagulo sa kahidlaw naumod

nagpaabot ang orasan
pagsingil sa ilang bayranan


-- GENALYN G. OMAPAS
Cebu City, Philippines

nahigmata

Nagdamgo si Anita
og Insik nga bana
nga maghatag niya
og daghang kwarta
apan nasayop siya;
ang gipiyal kaniya
wala'y lain kini ra:
kasilyas ug kusina.

-- RIC S. BASTASA

Katipunan, Zamboanga del Norte, Philippines

ting-init: berano

Mga dandelyon mikatap nakigligiray sa mga alibangbang
sa daplin sa Highway 54 sa Covington
Nag-utnga mga dahon
samtang gisilaban sa udtong tutok
Ugang mga tutonlan misuyop
sa mga tubod sa kaigang
samtang mga saop ug piyado nanunog
sa mga kogon sa nagpanilap nga hulaw sa Tominjao


-- MELQUIADITO M. ALLEGO
Palm Harbor, Florida, USA

pagdaginot

(hubad sa Iningles ni W.S. Merwin)

Dili na kinahanglang buk-on pa ang salamin.
Ania ang napusgayng nawong,
Paigo alang sa pito ka tuig nga pag-antos.

-- VICENTE VIVENCIO BANDILLO

Koror, Palau

ang gitara

(hubad sa balak ni Federico Garcia Lorca)

Ang gitara
misugod sa iyang paghilak.
Ang mga baso sa bino sa kaadlawon
nangapusgay.
Ang gitara
misugod sa iyang paghilak.
Way pulos
Nga kini pahilomon.
Imposible
Nga kini pahilomon.
Mohilak kini nga sum-ol,
sama nga ang tubig mohilak,
sama nga ang hangin mohilak
tabok sa wanang sa mga niyebe.
Imposible
nga kini pahilomon.
Mohilak kini
alang sa halayo’ng mga butang.
Balas nga gikan sa mainit nga Habagatan
nga nangayo og puti’ng mga camellia.
Mihilak kini, gapasan nga way puntariya,
gabii nga way kabuntagon,
Ug ang una’ng langgam
nga namatay sa sanga.
O gitara!
Kasingkasing nga nasamdan nga mortal
sa lima ka mga espada.

Gihubad ni:
-- URIAS A. ALMAGRO
New Berlin, Wisconsin, USA

usa ka bahaw nga sanglitanan labaw sa lawom nga kagutom sa atong kapupod-an

Mokayab ang mga paak apan bukog sa damgo ra ang ibayaw

Samtang maghangak ang mga alimango sa atong alimungaw.

-- MICHAEL U. OBENIETA

Topeka, Kansas, USA

habal-habal

bisan wala magkaila kitang duha ania nagkauban

sa habal-habal gilambid ang atong nahunahunaan
kon unsang pahumot ang akong gigamit
kon asang eskina ihunong mo ako og kalit
kining akong buhok sa imong aping gahatod og mga halok
may kamingaw bang miungot sa imong liog morag tunok
ug ikaw tingali wala masayod nga samtang kita gapadulong
gisubay pod nako og suway ang kurbada sa imong nawong
ug sa pag-untol sa ligid kinsang dughan ang mabag-id
kang kinsang pagbati ang masaag pagtungas sa bakilid

-- GENALYN G. OMAPAS

Cebu City, Philippines

pungpong sa kalipay

sama sa mga bulahan
usahay magpungpong ang kalipay
apan sama usab sa mga sagbot
mokuyanap ang kaligutgot

ug sa madugay ang tanan
maandan ra gyod niya

masugdan ra pod niya

ang pagpaanod-anod
hangtod mahimo siyang

usa ka gaan kaayo

nga panganod


-- RIC S. BASTASA
Katipunan, Zamboanga del Norte, Philippines

skype

nagsud-ong ako karon kanimo
gilimata sa nangumosta mong pahiyom
mahikap ko ang warawara sa linya sa kamingaw
sa nahiwasang tabil sa atong masigka-alindasay
(gahapon pang gihatod mo ako sa mactan)
nan, karon, ablihi ug sirhi ang haduol gilay-on
tali sa kasingkasing ta


-- MELQUIADITO M. ALLEGO
Palm Harbor, Florida, USA

pangutana

Pangutan-a ang bato
kon unsa na kadugay ang iyang paghikatulog
ug unsa ang iyang mga gidamgo

Pangutan-a ang pultahan
kon kapila na siya ablihi ug kapila siya sirhi
sa tibuok niyang kinabuhi

Pangutan-a ang mata
kon kapila siya motutok ug kapila siya mamilok
sa iyang pagsud-ong sa bughaw nga langit

Pangutan-a ang mga butang ning kalibotan
ug tingali, tingali sa napulo ka libo ka mga pangutana
makadawat ka og usa ka tubag

-- URIAS A. ALMAGRO
New Berlin, Wisconsin, USA

sa laing lapyahan

Sakura desu ka?

Nindot na untang pangkutluon
ang mga nag-ikid-ikid

nga mga cherry blossoms sa Hiroshima.

Magkat-on na unta ko pagbalanse

sa bisikleta nga akong sakyan padulong

sa Kambara Kisen, ug didto na unta nako

sugdan pagtapak-tapak ang mga pisa

sa akong mga damgo guyod ang mga baroto

nga mag hatod nako og yen.

Lami na unta tagamtamon ang bino

nga tinahod didto sa Hokkaido.
Moshi moshi, aregato guzaimatsu...
Dili lang kini ang akong makat-onan
nga pinilongan sa Japan kon

wala pa lang unta ko nangluod

sa lapyahan sa Balamban.


-- GENALYN G. OMAPAS
Cebu City, Philippines

nganong ibilin ang baraw

1. Kay gipul-an ka na niini.
2. Kay giuhaw ka.
3. Kay tam-is ang pahiyom sa babaye nga nagbantay sa pultahan.
4. Kay dili mo na maantos ang kahilom.
5. Kay ang baraw maoy bugtong yawe sa kamatuoran nga niining tungora dili na makaluwas kanimo.

-- VICENTE VIVENCIO BANDILLO

Koror, Palau

gayuma sa senior citizen casanova

(alang ni Dr. Ben Fajardo)

dili pa kita lawos bisan upaw na ang atong mga bungtod
mokatkat ug mokatkat pa kita bisan hina nang mga tuhod
di pa mabuta di pa mapangag
pogi gihapon seksing badyikyik masaag

-- MELQUIADITO M. ALLEGO
Palm Harbor, Florida, USA